I 8 DE SETENBRE DEL 1943

A me ricordo come che fuse deso có xe vegnù i 8 de setenbre del 1943. Jèrimo a Gianina, sul nostro acanpamento. Cheła sera łì mi jera de guardia al pèso [pezzo d’artiglieria]. Ła me bateria de Artiłieria Alpina ła gavea in dotasion sie pèsi – cuatro canonsini e dó mitrałie pexanti – e mi jera drio tèndare un canonsin.

Poco dopo łe sète xe pasà du Alpini, łì davanti de mi. E i me ga dito: «Semo stà scoltare ‘l radio-jornałe, e i ga dito che ghe xe stà l’armistisio. Someja che sia finìa ła guera, almanco par nialtri.»

Radio-jornałe? Mi no ło gavea mai sentìo mensonare. No sò gnanca dove che i fuse ‘ndà scoltarlo. Magari dentro su ła tenda dei uficiałi, parché no savarìa dove altro se nò.

Fato stà che, diexe minuti dopo, xe rivà fora i uficiałi. I gavea na facia bianca come ła morte. Sùito i ne ga dito de puntare l’artiłieria verso l’acanpamento tedesco. Bixognava pareciarse a tuto in atexa de órdini, parché gnanca łuri i savea de precixo cosa fare. No i gavea ciapà nesuna dispoxision né da l’Itałia né dal Comando itałian de Atene.

Pena che xe stà note – de sicuro ła pì łonga de tuta ła guera, vista ła situasion – i Greci i ga tacà mandarne dire che se nialtri gavésimo atacà i Tedeschi da davanti, łuri i łi gavarìa atacà a łe spałe. I jera propio convinti. Ma come xe che se faxea a métarse spararghe contro i Tedeschi? Cosa sarìa suceso dopo? Anca parché, pochi minuti dopo, i Tedeschi i ne ga mandà dire che se nialtri łi gavésimo atacà, łuri no i gavarìa sparà gnanca un colpo. I se gavarìa rifiutà, anca se i gavese bio l’órdine de farlo.

Magari cueste łe jera parołe vegnù fora propio dal Generałe a comando de ła 1a Divixion da Montagna tedesca, che ‘l jera tanto amigo del nostro Coloneło parché i gavea fato tute łe scółe insieme, in Germania. Ciò, sto Coloneło el jera un gran personajo; el jera stà Cònsołe a Mònaco de Baviera, e i dixea che ‘l parlava sète łingue.

Grecia, estate 1943. Accampamento.